وانتهى رعب الامتحانات وحلا الدراسه !

بسم الله الرحمن الرحيم

وأخيييييييييرن خلصنا الإمتحانات اللي ما بغت تخلص =.=”

عذاب نفسي بصراحه !

كانت الصدمه لما خبرونا أثناء السنه اننا ما راح نمتحن في منتصف السنه .. وإنما بنمتحن في نهاية السنه الكتب كامله لكل المواد

كان الخبر صاعقه بصراحه لأننا ما تعودنا ع شي من هالقبيل .. وخاصه انها بتكون آخر سنه .. و هي سنه مصيريه !

بس الحمدلله عدت ع خير وجبت النسبه اللي ترفع الراس ^_^ ..

96 > اذكروا الله

أيام عصيبه مرت .. يمر اليومين والثلاث وما أنام فيهم غير ساعتين أو 4 بالكثير ..

تعب وإرهاق !

خاصة الاسبوع الأخير ~ اسبوع المواد الأدبيه واللي فيها حفظ

كانت تاخذ من وقتي الكثير الكثير ..

وأروح الامتحان شبه نايمه ..

وأول ساعه من الإمتحان كل الحلول غلط × غلط >.<

وبعد ما أصحصح وأراجع الورق أكتشف الهبايب السوداء المكتوبه 

وأرجع أعدلها .. ويضيع وقت الإمتحان في هذا !

ما أنسى ورقة الانجليزي مهارات .. سمعت انه لازم نكتب 4 رايتنج واختبصت .. قلت الوقت ما بيكفي !

وأثناء الإمتحان تأكدت انه بالفعل بجب اننا نكتب 4 براجرافات لمواضيع مختلفه ..

وعاااد أنا والرايتنج سوالف !

أحتاج وقت للتفكير

وآخر للكتابة بالرصاص

وآخر للتأكد

وآخر للتحبير

فإذا سويت هالقصه كلها ما بخلص من الامتحان قبل نهاية اليوم !!

ومع مرور مليون شخصية ع قاعتنا وجميعها تأكد على موضوع الكتابة مباشرة بالحبر ~ عشان ما نتحجج بعدين ونقول ان الوقت ما كان يكفي لمسح اللي كتبناه بقلم الرصاص وتحبيره بالقلم الأزرق أو الأسود

فبدأت كل البراجرافات بكتابتها بالأزرق

ومع التشطيب والتعديل والأسهم اللي رايحه هنا وهناك

وبعد الإنتهاء من كل هذا

شفت ع ورقة الإجابه ووجدتها بشكل … لا يوصف بصراحه !

ولا دافنشي بزماناته

بصراحه .. خفت اني ارسب والسبب ان اللي يصحح ما يدري وين الكلام من الشخبطه والتشطيب ؟!!

كان أسوأ رايتنج كتبته فحياتي .. بس الحمدلله جبت فالمادة 97 .. مدري كيف خخخ

أرجع معكم لأول امتحان ..يوم السبت ..

مادة الثقافة الإسلاميه

كان امتحان جميل بصراحه لكنه طويل جدا جدا جدا جدا

ألفت كتاب فورقة الإمتحان  من كثر الكلام اللي كتبته

كتبت كل نقطه تتعلق بالسؤال حتى لو لها علاقه من بعيييييييييييييييد بس أقول ف خاطري أنا ما خسرانه لو كتبتها ! يمكن هي النقطه المطلوبه

رجعت البيت وإيدي تألمني من كثر الكتابه !

أذكر اليوم اللي قبل الإمتحان .. من كثر ما أذاكر وأحفظ نسيت كيف يبدأوا في الصلاه !!!!!!

رحت استعنت بأمي عشان تخبرني بداية الصلاه شو يقرأوا !

بجد حسيت مخي فاضي >_<

قالت لي امي : هذا وانتي عليج مادة إسلاميه ونسيتي صلاتج .. لو كانت ماده ثانيه شو بتسوي ؟ أظن بتنسين اسمج بعد

~

أما الامتحان الثاني يوم الأحد  .. فكان مهارات انجليزي .. واللي ذكرت قصته فوق

~

الإمتحان الثالث كان فيزياء بيوم الأربعاء .. أتعس امتحان لي في الثانوية !

وأقل نسبه جبتها فيه ..86 

امتحان سهل وبايخ فبعض الأسئله .. وصعب وغامض فأسئله أخرى

بالإضافه إلى انه امتحان طويل جدا جدا

كنت آخر من يخرج من قاعة الاختبار

ومع ذلك ما جاوبت ع أسئلته بالشكل المطلوب .. بس الحمدلله ع كل حال ..

كان يوم ثقيل جدا .. والحمدلله انه خلص ..

~

الإمتحان الرابع كان بيوم  السبت من الاسبوع اللي بعده .. ولكن بسبب إعصار فيت تأجل لاسبوع آخر ..

كان امتحان الكيمياء ..

امتحان حلو ~ بس بسبب نوبات النوم العنيفة اللي كانت تهجم علي أثناء الامتحان جاوبت ع بعض الأسئله خطأ

ولكن الحمدلله صححت الأخطاء بعد ما صحصحت  فالدقائق الأخيره

اللي أذكره اننا انتقلنا لصف آخر .. لأن قاعتنا الأساسيه كان المكيف فيها خربان .. والجو حار

بس الحمدلله عدّا الامتحان ع خير .. وجبت نسبه مقبوله .. 93 .. بس تمنيت أجيب أكثر فهالماده الحلوه

~

بعد اسبوع آخر – الاسبوع الأخير - اسبوع الهم والغم والقرف >_< – وفي يوم السبت ..

امتحان الرياضيات

أحللللللللى امتحان من مجموعة امتحانات الثانوية !

كان سهل سهل سهل بمعنى الكلمة والحمدلله

كان هالامتحان العلمي الوحيد من بين المجموعه الأدبيه القادمه !

صحيح كان حليو .. بس مذاكرته خذت مني وقت كثير جدا

خاصة وحدة التكامل

وآخ من هذي الوحده

خذت مني أكثر من يومين ..

وبليلة الجمعه - قبل يوم الامتحان - وصلت الساعه 8 بالليل .. وأنا لا زلت في الوحده الثانيه “التكامل” ولا زال الكثيير من هالوحده ما ذاكرته

ووحدتين ثانيات ما قرأتهم حتى !!

قررت اني أقلب فالأوراق .. آخذ الفكره فقط وما أحل مسائل .. ذاكرت ما تبقى من التكامل والوحده اللي بعدها بالنظر

وتركت الوحده الأخيره للصباح قبل لا أروح الامتحان

نمت ما يقارب ال3 ساعات فقط وصحيت للمذاكره

كانت وحدة القطوع .. قطع مكافئ - ناقص - زائد

القطع المكافئ عسسل .. الناقص حليو بس ما بحلاة المكافئ

أما الزائد ما مداني أذاكره ..

رن جرس بداية الإمتحان

قلبت الورق ع السريع .. أبحث عن قاعدة القطع الزائد

قرأتها بدون تركيز بعيون ناعسه

وأثناء حل الامتحان .. وبعدما حليت ربعه تقريبا حطيت راسي ع الطاوله .. كنت حاسه بنعاس فظييييييييع .. ف  جيت بنام ولكن خفت إذا نمت ما أصحى إلا بعد إنتهاء وقت الإمتحان .. فقمت بسرعه وكملت الحل بالرصاص .. >_<

وفي آخر سؤال من الامتحان

المطلوب : كتابة معادلة القطع المكافئ والناقص والزائد ..

حليت أول اثنين - المكافئ والناقص - ولكن الزائد ما قدرت أتذكره

وتأخرت كثير بسبب هالسؤال

أخيرا قررت اني أحبر باقي الامتحان ومن ثم أرجع وأحل هالسؤال

حاولت أتذكر وأتذكر وأتذكر .. وأخيرا .. حليت بطريقتي الخاصه

والله يستر على هذيك الطريقه !

المهم ان بالأخير طلع عندي ناتج وحبرته بالقلم الأزرق وتركت الورقه وطلعت

والحمدلله جبت درجه حلوه فالرياضيات

98

> اذكروا الله ^_^

~

يوم الأحد : امتحان هذا وطني

أكثر ماده أكرهها

كلها حفظ × حفظ × حفظ × حفظ

وأنا أكرررره الحفظ بشكل كبييير

وجاء الإمتحان .. أول مره وأنا أحل الاختياري أحس ان مخي فجأه توقف عن العمل

وما قدرت أتخيل وأتذكر أي معلومه متعلقه بأحد الأسئله

كان مخي فاضي تماما عن أي احتمال أو إجابه ..

الامتحان كان ما بين السهـــــــــــــــل في بعض الأسئله

والصعب جـــــــــــدا ف أسئله أخرى

بس أحمد ربي انه عدّا على خير ..

والحمدلله نسبتي فيه حلوه رغم كل هذا

98 .. رغم اني توقعت أقل من كذا بشوي .. بس الحمدلله راعونا أثناء التصحيح =)

~

الاثنين .. امتحان جغرافيا إذا ما خانتني ذاكرتي

كان سهل جدا لولا بعض الغموض فأسئلته

بس كالعاده .. لازم تكون عندي غلطه فالاختياري .. !

الغمممممممم ان المعلومه اللي غلطت فيها مكرره ف 3 دروس تقريبا

لا وبعد فالليله اللي قبل يوم الامتحان كنت اقول وأنا أذاكر المعلومه :

ياااخي شو هذا ؟ كم مره يعيدوها لنا هالمعلومه ؟! خلاص فهمتها فهمتهااااااااااااا

ولما جات في الامتحان غلطت فيها هههه

الحمد لك والشكر ع نعمة العقل يا رب

~

الثلاثاء : مادة المهارات الحياتيه .. الماده اللي كنت أشيل همها دووم بعد مادة هذا وطني

الحفظ فيها بشكل رهييب !

رحت الإمتحان ومجموعه كثيره من التعاريف والمعلومات ما حفظتها ..

قرأتها الصباح ع السريع ووكلت أمري لله

كان الامتحان سهل والحمدلله

مع غلطه في الاختياري طبعا ! لسؤال سخيف جدا جدا

سبحان الله .. ما أغلط غير في الاسئله السخيفه !

بس الحمدلله ع كل حال .. نسبتي كانت فهالماده حلوه ولله الحمد .. 97

~

يوم الأربعاء - اليوم الأخير- : امتحان العربي ” كتابي المؤنس والمفيد”

ياا حلاتك يالعربي !

أول 3 ورقات كل حلولي غلط خخخ

السؤال يطلب شي والاجابه اللي اكتبها شي آخر !

كنت مرهقه من طول الاسبوع لأني ما كنت أنام عدل ..

من حسن حظي اني كنت اكتب الحل بالرصاص ف ورقة الاسئله .. عشان ما أخبص ورقة الاجابه مثل اللي حصل في امتحان مهارات لغة انجليزيه

بعدما خلصت الحل .. راجعت المره الاولى وعدلت الاجاابات

وكان التعديل خاطئ

وراجعت المره الثانيه وعدلت مره اخرى وكان تعديل خاطئ ايضا !

المهم اني بالأخير صحصحت عدل وعدلت ع الإجابات بسلام بصوره صحيحه ولكن لما بقى عن نهاية الإمتحان قرابة النصف ساعه

وورقة الإجابه لا زالت فاااااضيه

والمراقبه على القاعه هاوشتني لأني ما بديت اكتب الحل فورقة الإجابه >_<

شغلت التوربو ونقلت كللللل الحلول بسرعه ف ورقة الإجابه ..

كان امتحان طوييل جدا بس الحمدلله قدرت انتهي من نقل الإجابه قبل انتهاء الزمن المحدد للإمتحان

وسلمت الورقه وطلعت من القاعه

..

وبدأت قصة وداع الصديقات والزميلات لآخر مره .. :”)

بعدها قضيت باقي الوقت مع ليلى .. إلى أن ذهبت كل واحده منا لحال سبيلها > أحلى فصحى

وانتهى بذلك رعب الإمتحانات .. وحلا أيام الدراسه

واعذروني كثرت كلام .. بس حبيت أتذكر هالذكريات بتفاصيلها بعد كم سنه لما أقرأ هالصفحه ^_^